Jako unija widźimy wokrjes Budyšin a naš susodny wokrjes Zhorjelc jako hornjołužisku zhromadnosć. Inwesticije krajneje a zwjazkoweje runiny dyrbja so konstruktiwnje mjez sobu wothłosować. W zapadźe našeho wokrjesa widźimy krajnu stolicu Drježdźany jako partnera za zhromadne wuwiće našeje domizny.
K tomu ličimy płoniny za zasydlenje předewzaćow, wothłosowane planowanje šulskich syćow a bydlenskich płoninow, kaž tež derje splećeny zjawny wobchad. Zhromadnje ze Zhorjelskim wokrjesom a městom Drježdźany zasadźujemy so za předźěłanje krajneho wuwićoweho plana Swobodneho stata Sakskeje, zo bychmy zadźěwkam, kotrež wuwiće našich městow a gmejnow haća, zadźěłali.
To samsne płaći za krajnu hranicu k Braniborskej a za industrijowy park Čorna Pumpa.
Runje tak chcemy dalše zhromadne skutkowanje w Euroregionje Nysa podpěrać. To je wažne, zo bychmy zhromadne dźěło z našimi partnerami w Čěskej republice a Pólskej skrućili. Zhromadne dźěło z našimi pólskimi a čěskimi susodami wopokaza so předewšěm přez komunalne partnerstwa. Tute dźěło podpěruje so z pomocu europskich spěchowanskich programow, kotrež wužiwamy.
