Kmane a wukonliwe wobchadne infrastruktury - dróhi a kolije - su za naš wokrjes, kotryž je na hospodarstwo wusměrjeny, přewšo trěbne. Tuž dyrbitaj so awtodróha A4 a železniska čara Drježdźany - Zhorjelc tak spěšnje kaž móžno wutwarić. Runočasnje ma so železniska čara elektrifikować, zo bychu so z tym wuměnjenja za dalokowobchadne ćahi kaž tež hospodarski, ekologisce lěpši a tež spěšniši bliski wobchad wutworili. Nimo toho zasadźujemy so za to, železnisku čaru Kamjenc - Njedźichow - Wojerecy - Hóznja (železniska čara Łužiska jězorina) wukmanjeć a z tym bórze za wosobowy wobchad wužiwać móc.
Pola Zwjazka ma so na to tłóčić, zo so dróhotwarske projekty, kaž wjesna wobjězdka Woćicy-Okrila a wu- a nowotwar drohi B 156 pola Delnjeje Hórki na zakładźe zwjazkoweho wobchadneho plana nanajspěšnišo zwoprawdźa. Za dalši wutwar drohi B 97 mjez Drježdźanami, Wojerecami a Grodkom (Čorna Pumpa) so dale zasadźujemy.
Wokrjes Budyšin ma z wjace hač 800 kilometrami jara wobšěrnu syć dróhow. Wjace hač 50 % tuteje syće dróhow ma za wuwiće našeho wokrjesa wusahowacy wuznam. Na zakładźe koncepcije wokrjesnych dróhow maja so wosebje tute wotrězki wotpowědnje wudźeržować resp. wutwarić. Přidatnje dyrbi so wěstota w nadróžnym wobchadźe, runje za najmłódšich wobdźělnikow wobchada, polěpšić.
Za mobilitu ludźi změje kolesowarski wobchad w přichodźe hišće wjetši wuznam. Budźemy so tuž za to zasadźeć, zo so předewšěm drohi koncepcije kolesowanskich šćežkow wu-resp. znowa twarja. Z tym chcemy hišće wobstejace njedostatki kolesowarskeje syće wotstronić a wěstotu we wobchadźe dale zwyšić.
Wokrjes Budyšin je w minjenych lětach zhromadnje z wobchadnymaj zwjazkomaj busowy poskitk wosebje z plusowymi a taktowymi busami wobšěrnje rozšěrił. Tutón poskitk mamy dale polěpšić, zo by potrjebam mobility ludźi w našim skerje wjesnym ale runje tak tež hospodarsce wukonliwym wokrjesu wotpowědował. To samsne płaći za móžne zjednoćenje sakskich wobchadnych zwjazkow. Hłowny cil je kmana a wukonliwa wobchadna syć, zo bychu so wokrjesnemu wuwiću a strukturnej změnje kmane šansy skićili.
