Wokrjes je nošer wjacorych wysokich šulow, gymnazijow, spěchowanskich šulow a powołanskich šulow. Ma z tym wulku zamołwitosć za kubłanje młodych ludźi. W tutym wobłuku smy wažne inwesticije mjez druhim w šulach w Barće, Radebergu, Arnsdorfje a Wulkich Rědorjecach ale tež w powołanskej šuli we Wojerecach zwoprawdźili.
Wokrjes Budyšin skića mnohostronske wukubłanje na powołanskich šulach a dualnych kubłanišćach. K tomu liči tež Statna studijna akademija Budyšin, kotraž so na wysokošulske stejnišćo wutwari.
Nowotwar wokrjesneje hudźbneje šule w Budyšinje je nam tohorunja wažna naležnosć. W zapadnej wokrjesnej kónčinje budźemy naše planowanje šulskeje syće wusko z krajnej stolicu Drježdźany wothłosować, zo bychmy optimalnu strukturu za šulerki a šulerjow poskićeć móhli. Za moderne wuhotowanje našich šulow zaplanujemy dale trěbne srědki.
