Naš region ma wšitkim generacijam być dale žiwjenjahódna domizna.
Za to su wěste a derje płaćene dźěłowe městna trěbne, za kotrež so dale zasadźujemy. Runje tak mamy dźiwać na žiwjenske wobstejnosće našich wobydlerjow. To woznamjenja, zo trjebamy pěstowarnje a šule. Runje tak trjebamy kmane posłužby w strowotnistwje a poskitki zastaranja starych. Mjenowane poskitki maja so hišće sylnišo na potrjebje čłowjekow wusměrić.
Saněrowanje haloweju kupjelow w Kamjencu a Korzymju je wažny nadawk, kotryž tež turizm spěchuje. Zasadźujemy so za spěšne zwoprawdźenje saněrowanja a dalši přichod kupjelow. Za to załožimy zaměrowej zwjazkaj.
Kultura a turizm stej wažnej faktoraj za naš wokrjes. Chcemy turizm w našim regionje dale zesylnić. Nimo stawiznow wuznamnych městow Budyšin, Biskopicy, Wojerecy, Kamjenc a Radeberg, maja so wosebitosće turistiskich regionow wotkrywać, wuwiwać a zdźeržeć.
Wosebite ćežišćo je wuwiće Łužiskeje jězoriny. Ze sylnym a jednanja kmanym zaměrowym zwjazkom Łužiskeje jězoriny maja so wotpowědne komuny při wuwiću infrastruktury podpěrać. Tute wuwiće je zakład za dalše inwesticije do regiona, kotryž ma wočerstwjenje a dožiwjenja skićić.
Budźemy tuž dalši wutwar syće kolesowanskich šćežkow we Łužiskej jězorinje přesadźić a so pola swobodneho stata za to zasadźować, tudyše turistiske předewzaća při wuwiću cyłolětnych poskitkow podpěrać. Wosebite projekty, kaž wutwar kwalifikowanje kolesowarskeje čary "Serbske impresije" podpěramy.
Tež našu bohatu a husto dwurěčnu kulturnu krajinu chcemy w času snadnych kasow po mocach dale podpěrać. Tomu ličimy našu wokrjesnu hudźbnu šulu, naše dźiwadła a zarjadowanišća, kaž tež wšelke muzeje a wopomnišća našeho wokrjesa.
