Wokrjes podpěruje dźěło wšitkich powołanskich branšow a jich zwjazkow. Firmy přewodźamy při přizwolenskich procesach, kotrež měli w bliskim času so wotměć a prawnisce wěste być.
Budźemy strukturnu změnu zaměrnje a wuspěšnje zmištrować. Wot Zwjazka přizwolene financne srědki skića jónkrótnu šansu naš region wuwiwać. Změny su šansy, wubudźa pak tež njewěstosće. Towaršnostny dialog je nam tuž jara wažny. Jenož tak poradźi so strukturna změna, kotraž pomha, dalšich hospodarskich akterow do Łužicy wabić. Poradźena strukturna změna twori žiwjenske perspektiwy.
Twarski slědźenski centrum „Living Art of Building“ (LAB), Astrocentrum Łužica (ACŁ/DZA) a stejnišćo wójska maja we Łužicy nastać. Za to je so wokrjes zasadźował. Tute projekty podpěramy w přichodnych lětach ze wšej mocu při dalšim wuwiću. Runje tak spěchujemy zasydlenja dalšich firmow a institucijow poboku horjeka mjenowanych projektow.
Po płoninje smy najwjetši wokrjes w Swobodnym staće Sakskej. Mamy dobre struktury na polu ratarstwa, rybarstwa a lěsnistwa. Tute budźemy dale podpěrać.
Lěto 2038 bu we wuslědku mnohich kompromisow politisce postajene a w zakonju zapisane. CDU wuznawa so w zamołwitosći za stwórbu Božu k transformaciji naslědneho zastaranja z energiju. Budźemy we wobłuku swojeje politiskeje zamołwitosće techniske inowacije a wutwar regeneratiwnych formow energije spěchować.
Wažny stołp našeho domjaceho hospodarstwa su srjedźostawske a rjemjeslniske předewzaća. Hač skerje tradicionalne abo inowatiwne a z modernymi produktami dźensnišeho časa: zasadźujemy so za dobre spěchowanje hospodarstwa a wusměrjamy wid zaměrnje na potrjeby předewzaćow našeho wokrjesa, jich sobudźěłaćerkow a sobudźěłaćerjow. Zawěsćenje naslědnistwow we wjednistwach předewzaćow a wobstejnosće, kotrež załoženje nowych firmow podpěruja, stej ćežišći našeje dźěławosće w přichodnych lětach.
